Lífefnafræði er mikilvæg undirstöðugrein á öllum sviðum líffræði- og heilbrigðisgreina auk þess að vera sjálfstæð fræðigrein við háskóla hér á landi og erlendis. Líftækni og erfðarannsóknir byggja að mestu leyti á lífefnafræði. Í þessum áfanga er leitast við að gefa góða yfirsýn yfir helstu efnisþætti fræðigreinarinnar þannig að það megi nýtast sem flestum nemendum náttúrufræðibrautar í háskólanámi á sviði líffræði, heilbrigðisfræði eða efnafræði.
Fjallað er um gerð, eiginleika og efnahvörf
helstu byggingarefna, orkuefna og stjórnefna lífvera. Einnig er fjallað um
efnaskipti þessara sömu efna í frumum líkamans þar sem helstu niðurbrots- og
nýmyndunarferlum er lýst á sameindagrunni. Efnið tengist mjög víða reynsluheim
nemenda og má þar nefna ítarlega umfjöllun um helstu orkuefni, næringu,
fitubrennslu, megrun og offitu og áhersla lögð á að sem flestir læri að taka
ábyrgð á eigin heilsu á grundvelli þekkingar en láti ekki blekkjast af skrumi,
gylliboðum og boðskap heilsutrúða. Í raun fjallar þessi áfangi um öll helstu
lífefnin, gerð þeirra, eiginleika og efnahvörf í blíðu og stríðu.
- Teacher: Andri Gylfason